Tveimur norður-kóreskum karlmönnum á þrítugsaldri hefur verið vísað frá Suður-Kóreu en þangað flúðu þeir nýlega í fiskibát frá heimalandinu. Þeir sóttu um hæli en í stað þess að fá það nær umsvifalaust eins og flóttamenn frá Norður-Kóreu fá venjulega voru þeir færðir til yfirheyrslu. Ástæðan er að þeir eru grunaðir um að hafa drepið 16 félaga sína á smokkfiskveiðibátnum, sem þeir störfuðu á, til að geta síðan flúið suður á bóginn.

Suður-Kórea tekur jafnan við öllum þeim Norður-Kóreumönnum sen þangað flýja undan hungri, fátækt og kúgun. En ekki í þessu tilfelli. Talsmaður sameiningarráðuneytis landsins segir að mönnunum hafi verið vísað úr landi því þeir hafi framið alvarlegt, ekki pólitískt, afbrot og eigi því ekki lögmætan rétt á vernd.

Mennirnir voru afhentir norður-kóreskum yfirvöldum í landamærabænum Panmunjom.