Félag atvinnurekenda hefur skrifað Svandísi Svavarsdóttur heilbrigðisráðherra bréf og ítrekað boð sitt og félagsmanna sinna um samstarf við ráðuneytið og stofnanir þess um að tryggja að vinna stjórnvalda byggi á réttum gögnum um sykurneyslu. Þetta kemur fram á vef FA.

„FA hefur bent á að í aðgerðaáætlun Landlæknisembættisins gegn sykurneyslu er byggt á gögnum um gosdrykkjaneyslu, sem eru orðin átta ára gömul og félagið telur þar að auki rangtúlkuð. Á átta árum hefur hlutdeild sykraðra gosdrykkja lækkað úr 60% í 40%, um leið og hlutdeild kolsýrðs vatns tvöfaldaðist. Heilbrigðisráðuneytið og Landlæknisembættið hafa sýnt áreiðanlegum gögnum um mikinn samdrátt í neyslu Íslendinga á sykruðu gosi – án opinberrar neyslustýringar – einkennilega lítinn áhuga,“

segir Ólafur Stephensen, framkvæmdastjóri FA.

FA benti á að Landlæknisembættið hefði ekki sinnt óskum framleiðenda og innflytjenda gosdrykkja um samtal um það hvernig megi tryggja að gögn, sem embættið byggir tillögur sínar á, séu rétt. Ráðuneytið svaraði ekki þessu bréfi, samkvæmt vef FA.