Samkvæmt ársreikningi Kaupþings fyrir árið 2018 fengu 17 starfsmenn bankans greidda rúma 3.5 milljarða í laun. Þar af fékk stjórnin, um 4-5 manns og forstjóri Kaupþings ehf., alls 1.216 milljónir króna í laun það árið, sem er hækkun um 672 milljónir frá fyrra ári. Kaupþing ehf. heldur utan um eignir þrotabús hins fallna Kaupþings banka.
Í heildina er þetta hækkun upp á 900 milljónir milli ára þó svo að starfsfólki hafi fækkað úr 30 í 17 frá árinu 2016. Á sama tíma hafa greiðslurnar hinsvegar hækkað um 1.9 milljarð.
Meðaltal launa var því 208.3 milljónir á ári, eða 17.4 milljónir á mánuði. Miðgildi heildarlauna á Íslandi árið 2018 var 632 þúsund krónur á mánuði. Kjarninn greinir frá.
Tveir Íslendingar sátu í stjórn félagsins í fyrra, lögmaðurinn Óttar Pálsson og Benedikt Gíslason, nú bankastjóri Arion banka, en hann hætti í ágúst.
Þrjár blaðsíður vantaði í ársreikning Kaupþings fyrir árið 2018 sem skilað var inn til fyrirtækjaskrár. Það vill svo til að einmitt á þeim blaðsíðum komu fram upplýsingarnar um launin til starfsmanna Kaupþings. Kjarninn kallaði eftir því að fá síðurnar afhentar, og fékk þær um liðna helgi, ásamt þeirri skýringu að mistök hafi orðið hjá Ríkisskattstjóra við skönnun reikningsins, sem hafi skýrt af hverju blaðsíðurnar vantaði. Hinsvegar ætli Kaupþing að láta fyrirtækjaskrá Ríkisskattstjóra vita af mistökunum.
