Fiat Chrysler, Ford, Daimler, BMW, Toyota og General Motors eru meðal þeirra bílaframleiðenda sem hafa haft sig hvað mest í frammi við að fresta eða koma í veg fyrir breytingar sem hafa það að marki að draga úr losun gróðurhúsalofttegunda.
Þetta er meðal þess sem kemur fram í grein breska blaðsins Guardian, en blaðið birtir þessa dagana greinaflokk um loftslagsbreytingar og þau fyrirtæki og stofnanir sem helst bera ábyrgð á þeim.
Í dag beinir Guardian sjónum sínum að bílaframleiðendum. Í greininni er bent á að þó bílaframleiðendur hafi, á yfirborðinu að minnsta kosti, talað fyrir aðgerðum í þágu loftslagsins, til dæmis með aukinni rafbílavæðingu, hafi þau barist gegn þeim á bak við tjöldin.
Þannig hafi þau dælt milljónum dala í lobbíisma gegn laga- og reglugerðarbreytingum sem hafa það markmið að draga úr losun gróðurhúsalofttegunda.
Guardian óskaði eftir afstöðu þeirra bílaframleiðenda sem nefndir eru hér að ofan. Flest sögðust skuldbundin því að draga úr losun skaðlegra lofttegunda en taka þyrfti mið af markaðaaðstæðum, vilja neytenda og þróunar nýrrar tækni.
