„Þetta á að vera þannig að við eigum að spotta það hvar viðkomandi nýtur sín best. Þannig á skólakerfið að vera, þannig að þú komir út fullur af sjálfstrausti og þú átt að trúa því þegar þú ert 16 ára að allir vegir séu færir. Þegar búið er að brjóta þig niður í prófum ár eftir ár, þá sjá menn hvað þetta er fáránlegt.“

Þetta segir Magnús Scheving, athafnamaður og stofnandi Latabæjar. Magnús var í viðtali við hlaðvarpið Prímatekið en tiltekinn bútur þar sem rætt er um galla skólakerfisins á Íslandi hefur verið í víðri dreifingu á samfélagsmiðlum undanfarna daga.

Magnús segist ekki hafa áhyggjur af ungu kynslóðinni í dag en hefur þó áhyggjur af skólakerfinu, eins og ítarleg útskýring hans að ofan gefur til kynna. Hann er á móti því að nemendur þurfi að taka próf og er hann jafnframt alfarið á móti einkunnarkerfum.
Magnús tekur samræmd próf sem dæmi:

„Þarna er krakkinn heima hjá sér að fara á taugum yfir því að próf séu að koma. Myndir þú vilja fjármálastjóra sem væri á taugum í vinnunni hjá þér daginn áður en mikilvægasti fundurinn væri? Þess vegna eiga krakkar ekki að hafa áhyggjur af prófi. Það eru kennarar sem eiga að hafa áhyggjur af prófunum, því ef krakkinn fellur, þá missir kennarinn djobbið,“ segir Magnús.

„Sumir eru bara ekkert góðir í því að lesa texta og muna. Það er til fullt af fólki sem er rosalega handlagið en er mjög lélegt í stærðfræði. Ég þekki rosalega marga sem eru lélegir í því að muna nöfn en eru gríðarlega færir á öðrum sviðum. Þetta er galið!“