Leikstjórinn Baltasar Kormákur hefur átt einstaklega góðu gengi að fagna síðustu ár og hefur náð frábærum árangri á erlendri grundu í leikstjórastólnum. Baltasar sagði sig nýverið frá stórmyndinni Deeper sem verður líklega aldrei af, en þá skapast enn fremur rými fyrir Baltasar til að kanna nýjar lendur í glysheimum. Því fannst okkur forvitnilegt að leggja fyrir hann tarotspil og sjá hvað framtíðin ber í skauti sér. Þeir sem hafa áhuga á tarotspilum geta síðan dregið sín eigin á vef DV.
Fyrsta spilið er einstaklega lýsandi fyrir þá tíma sem eru nú í fortíðinni en það er spilið 7 sverð. Það merkir öflugar hindranir sem þó er hægt að yfirstíga vegna mikilla vitsmuna Baltasars. Framhaldið verður sniðið að þörfum leikstjórans ef hann leggur sig fram við að skapa sína eigin framtíð. Nú þarf Baltasar að standa fast á sínu og ekki taka hvaða verkefni sem gefst.
Næsta spil táknar persónuleika leikstjórans en það er spilið Myntgosi. Baltasar er svo vinnusamur, skipulagður, duglegur og metnaðarfullur og þrífst best þegar hann stefnir hátt – líkt og hann hefur gert síðustu ár, ef ekki áratugi. Baltasar leiðist um þessar mundir þar sem ekkert spennandi hefur rekið á fjörur hans en hann má alls ekki missa móðinn. Tímabilið núna er líkt og próf þar til næsti kafli hefst. Það er verið að þjálfa Baltasar í takast á við mótlæti og verður næsta skref hans gjöfult ef hann getur verið þolinmóður.
Næstur er Stafariddarinn sem túlkar hið óheflaða sjálf Baltasars. Hann er villtur og óábyrgur stundum og leitar uppi ævintýri. Á hinn bóginn er hann hlýr, gjafmildur, skemmtilegur og vinmargur. Í spilinu birtist einnig teikn um flutninga til útlanda og mikið ævintýri framundan þar sem fegurðin er fólgin í smáatriðunum. Baltasar þarf að leggja á sig mikið líkamlegt erfiði til að komast á spennandi stað og þarf að gera það með hraði. Hér gæti verið nýtt hlutverk þar sem Baltasar fær ekki aðeins að leikstýra heldur einnig að láta leiklistarhæfileika sína skína fyrir framan myndavélina.
