Fyrrum listaverkasali á Manhattan í New York er aðalpersónan í einu stærsta máli sögunnar hvað varðar þjófnað og smygl á menningarverðmætum. Rannsókn bandarískra yfirvalda hefur leitt í ljós að alþjóðlegur hópur smyglara, undir forystu listaverkasalans fyrrverandi Subhash Kapoor, hafi smyglað alþjóðlegum menningargersemum að verðmæti rúmlega 145 milljóna dollara á síðustu 30 árum.

New York Times skýrir frá þessu. Kapoor situr þessa dagana í fangelsi á Indlandi en þar hefur hann setið í átta ár og beðið réttarhalda vegna svipaðra mála. Eftir að honum var stungið í fangelsi á Indlandi 2011 sögðu bandarísk yfirvöld hann vera einn „afkastamesta listaverkasmyglara“ heims.

Allt fram til 2011 starfaði Kapoor við sölu listmuna í New York og var honum oft hrósað í listaheiminum fyrir ótrúlega lagni hans við að útvega ótrúleg listaverk og menningarverðmæti. Þá vöktu rausnarleg framlög hans til margra safna mikla athygli.

Hópur Kapoor lagði mikið á sig til að láta líta út fyrir að þjófnaðirnir og smyglið væri löglegt. Fyrst stálu þeir menningarverðmætum úr hofum sögulegum byggingum í ýmsum löndum. Þar á meðal Afganistan, Indlandi, Nepal, Pakistan, Taílandi og Kambódíu. Því næst var tekið til við að útbúa fölsk skjöl um uppruna munanna sem voru síðan seldir í mörgum af þekktustu galleríum heims.

Bandarísk yfirvöld hafa lagt hald á um 2.600 listaverk, að verðmæti 107 milljóna dollara, í ýmsum geymslurýmum í New York. En sögunni er ekki lokið því enn á eftir að hafa upp á 39 verðmætustu listaverkunum en verðmæti þeirra er um 36 milljónir dollara. Talið er að fjölskyldumeðlimir Kapoor viti hvar þau eru og leyni þeim fyrir yfirvöldum.