Sanna Madgalena Mörtudóttir, borgarfulltrúi Sósíalistaflokks Íslands, lagði fram fyrirspurn til íþrótta- og tómstundasviðs Reykjavíkurborgar um af hverju ekki væri hægt að niðurgreiða sumarnámskeið með frístundarkortinu.

Frístundarkortið veitir 50 þúsund króna styrk á ári til að niðurgreiða þátttöku- og æfingargjöld barna og unglinga, en Sanna bendir á að sá kostnaður geti vel farið yfir 50 þúsund krónur á ári, og því nýtist kortið ekki þeim foreldrum sem ekki hafa efni á því að greiða mismuninn sem upp á vantar.

„Þú ert ekki að fara að skrá barnið þitt í eitthvað ef þú getur svo ekki borgað mismuninn. Það er því skiljanlegt að foreldrar vilji nýta þetta í sumarnámskeið en það er ekki leyfilegt,“

segir Sanna. Hún segir reglurnar kveða á um að „ekki séu veittir styrkir vegna hefðbundinna sumarnámskeiða sem ná ekki 10 vikna lengd nema sérstök og málefnaleg sjónarmið eigi við.“ Þá sé það mat Íþrótta- og tómstundasvið hvort veita eigi undanþágu hverju sinni.

Sanna spyr hver sé ástæða þess:

„Svarið snýr að því að stutt námskeið stuðli ekki að reglubundinni þátttöku í skipulegu frístundastarfi og séu því ekki jafn árangursrík í að styrkja félagsfærni barna. Hugmyndin með frístundakortið er m.a. að reyna að tryggja að iðkendur tengist félagslegu umhverfi yfir ákveðinn lágmarkstíma. Þetta er falleg pæling, að reyna að tryggja að börn taki þátt í lengri námskeiðum en því miður er veruleikinn sá að það stendur ekki öllum til boða að greiða heildarkostnaðinn fyrir slíkt og ég á mjög erfitt með að átta mig á því hvernig þetta samrýmist yfirlýstum markmiðum um frístundakortið. Á vefsíðu borgarinnar kemur fram að „Markmið og tilgangur Frístundakortsins er að öll börn og unglingar í Reykjavík 6 – 18 ára geti tekið þátt í uppbyggilegu frístundastarfi óháð efnahag eða félagslegum aðstæðum. Frístundakortinu er ætlað að auka jöfnuð í samfélaginu og fjölbreytileika í iðkun íþrótta-, lista- og tómstundastarfsemi.“