Laurence Olivier-leiklistarverðlaunin voru veitt við hátíðlega athöfn í London síðastliðinn sunnudag. Leikritið vinsæla Harry Potter og bölvun barnsins sankaði að sér verðlaunum, var tilnefnt til ellefu verðlauna og hlaut níu. Þar á meðal var það valið besta leikritið, John Tiffany var valinn besti leikstjórinn, leikarinn Jamie Parker fékk verðlaun fyrir leik sinn en hann fer með hlutverk Harrys Potter. Norma Dumezweni var valin besta leikkona í aukahlutverki, en hún leikur Hermione Granger, og Anthony Boyle var valinn besti leikari í aukahlutverki fyrir túlkun sína á Scorpius Malfoy. Kvöldið var sigur fyrir alla aðstandendur leikritsins um Harry Potter en slegist er um miða á sýninguna.
Meðal sigurvegara sem tengdust ekki Harry Potter-sýningunni má nefna að leikkonan Billie Piper var valin besta leikkonan fyrir leik sinn í Yermu eftir Lorca.
