Endurupptökunefnd hefur úrskurðað að taka beri upp mál Tryggva Rúnars Leifssonar í Guðmundar- og Geirfinnsmálunum sem og mál Sævars Ciesielski. Þetta kemur fram á vef Ríkisútvarpsins.
Synir Sævars staðfestu þetta við fréttastofu RÚV. Sævar var dæmdur í 17 ára fangelsi. Sævar Marinó Ciesielski lést af slysförum í Kaupmannahöfn árið 2011, þá 56 ára gamall.
Sævar hlaut ævilangan fangelsisdóm vegna Geirfinnsmálsins, en Hæstiréttur mildaði dóm hans síðar og Sævar sat inni í níu ár af sautján ára dómi. Dómurinn var byggður á játningu sem Sævar sagði hafa verið knúna fram með miklu harðræði. Hann sat lengi í einangrun á meðan málið var rannsakað, eða alls 106 vikur í einangrunarvist.
Þegar hann var látinn laus úr fangelsi árið 1984 barðist hann fyrir því að málið yrði tekið upp aftur, en Sævar lýsti alltaf yfir sakleysi sínu og taldi að á sér hefði verið framið réttarmorð. Hann barðist fyrir endurupptöku málsins og árið 1993 og 2008 fór hann formlega fram á það, en því var hafnað.
Tryggvi Rúnar var dæmdur í þrettán ára fangelsi árið 1980 fyrir morðið á Guðmundi Einarssyni. Tryggvi Rúnar lést árið 2009.
Samkvæmt úrskurði endurupptökunefndar mun Hæstiréttur Íslands því fjalla að nýju um mál hans. Endurupptökunefnd mun birta úrskurði sína í málum Tryggva Rúnars og fimm annarra sakborninga klukkan 14:00 í dag.
Frekari frétta er að vænta í dag. Ekki hefur verið greint frá hvort mál Erlu Bolladóttur verður tekið fyrir að nýju.
