Jón Baldvin Hannibalsson, fyrrverandi ráðherra, sætir nú ásökunum um kynferðislega áreitni frá ýmsum konum, þar á meðal dóttur sinni. Óvænt hefur hann fengið stuðning frá hægri popúlískum öflum sem tæpast gætu talist pólitískir samherjar hans. Hefur það verið nefnt að tímasetningin á ásökunum sé ekki tilviljun. Jón hafi nýlega talað gegn þriðja orkupakka Evrópusambandsins.
Svipað var uppi á tengingum árið 2012 þegar Nýtt líf birti bréf Jóns til ungrar systurdóttur eiginkonu hans, Bryndísar Schram. Þá var framboð Jóns til forseta í undirbúningi og hann velti fyrir sér tímasetningunni.
Staðreyndin er sú að þolendur koma fram þegar þeir eru tilbúnir til þess, árum eða áratugum eftir atburði. Aðstæður breytast og sömuleiðis tíðarandinn. Að setja þetta í samhengi við núverandi vafstur geranda er sturlun.
