Það er venja margra foreldra á Norðurlöndunum að láta börn sín sofa úti við í vagni. Lögreglan í Noregi hefur nú varað foreldra við þessu í kjölfar þess að refur hoppaði upp í barnavagn, þar sem 10 mánaða barn svaf, og réðst á það. Þetta gerðist í Finnmörku í norðurhluta landsins.

Það vildi til happs að foreldrarnir höfðu sett hlustunartæki í vagninn þannig að þau gátu heyrt ef eitthvað gerðist í og við vagninn.

„Þegar ég kom út var árásargjarn refur hálfur ofan í vagninum og tíu mánaða Sander öskraði og það blæddi úr kinn hans.“

Sagði faðir hans, Bjørn-Milliam Angell, í samtali við vg.no. Hann tók blómapott og sló til refsins með honum en hann haggaðist ekki heldur varð enn árásargjarnari og illskeyttari. Bjørn öskraði þá á refinn og náði að draga barnavagninn inn í forstofuna en refurinn reyndi að fylgja á eftir inn.

Refurinn var magur, hárlaus og hafði misst helminginn af skottinu. Það er vegna sjúkdóms sem getur lagst á refi en hann veldur kláða og klóra refir feldin af sér og verða árásargjarnir. Refir, sem fá þennan sjúkdóm, drepast innan nokkurra mánaða úr kulda, vannæringu og fleiru.

Talsmaður lögreglunnar sagði í samtali við VG að þetta hefði getað farið mun verr því refurinn hefði í versta falli getað dregið Sander upp úr vagninum.

Sander hefur það gott, er með áverka eftir refinn en er að jafna sig.

Refurinn hefur ekki enn fundist.