Billy Hopkin, tveggja ára gamall drengur sem fæddist með sjaldgæfan hjartagalla, fékk einstakt verkefni núna fyrir jólin.

Billy fékk að stjórna jólaljósunum í kringum Seven Dials minnismerkið í West End í London með hjartslætti sínum.

Ljósin flöktu þar til Billy tók við og ljósin blikkuðu í takt við hjartslátt hans. Hversu fallegt?

„Jólin eiga að vera hamingjuríkasti tími ársins, en það er auðvelt að gleyma því að margar fjölskyldur eru að ganga í gegnum erfitt tímabil, og hafa jafnvel ekki tækifæri á að verja jólunum saman,” segir Rebecca, mamma Billy.

„Mig langaði að vera með í þessu verkefni af því að við höfum oft átt erfitt á jólum og ég vildi að aðrar fjölskyldur í sömu stöðu vissu að þær eru ekki einar.“

Verkefnið fór fram til að vekja athygli á og safna fjármunum til styrktar Tiny Tickers góðgerðarsamtökunum.

„Það er mikilvægt að halda umræðunni háværri og vekja athygli á hjartasjúkdómum, en líka að vekja athygli fólks á þeim áhrifum sem sjúkdómurinn hefur á fjölskylduna í heild,“ segir Rebecca.

„Við viljum að fólk staldri við og hugsi, af því að sjúkdómurinn getur komið fyrir hjá hverjum sem er. Sem betur fer njótum við góðs stuðnings góðgerðarsamtaka eins og Tiny Tickers, en peningarnir vaxa ekki á trjánum, þeir koma frá almenningi. Þannig að ég vona að verkefnið fái fólk til að gefa, þó ekki sé nema litla upphæð.“