Rektor Háskóla Íslands, Jón Atli Benediktsson, hefur sent frá sér yfirlýsingu vegna máls Sigrúnar Helgu Lund og Sigurðar Yngva Kristinssonar, prófessora við skólann. Sigrún Helga sagði starfi sínu lausu í dag vegna meintrar áralangrar áreitni Sigurðar og meints aðgerðaleysis háskólans í málinu. Sigrún greinir frá því að hún hafi kært Sigurð til siðanefndar háskólans sem hafi fundið hann sekan. Þó hafi háskólinn ekkert aðhafst í málinu mánuðum saman eftir að dómur féll. Sigrún sakar Sigurð meðal annars um andlegt ofbeldi og kynferðislega áreitni.

Sigurður svaraði ásökunum Sigrúnar í dag og segir þær rangar. Hann bendir jafnframt á að siðanefndin hafi aðeins fundið hann sekan um eitt ákæruatriði, brot á jafnræðisreglu, sem sé ekki alvarlegt. Sjá nánar hér.

Í yfirlýsingu sinni bendir háskólarektor á að hann geti ekki fjallað efnislega um mál einstaklinga en staðhæfir að verkferlar háskólans í málum af þessu tagi séu vandaðir. Yfirlýsingin er eftirfarandi:

 

Yfirlýsing rektors Háskóla Íslands í tilefni af umfjöllun fjölmiðla um uppsögn prófessors.

 Háskóli Íslands leggur ríka áherslu á að til staðar séu úrræði fyrir starfsmenn og nemendur sem telja á sér brotið. Háskólinn starfrækir m.a. sérstaka siðanefnd, fagráð um viðbrögð við kynbundinni og kynferðislegri áreitni og kynbundnu og kynferðislegu ofbeldi, og viðbragðsteymi vegna eineltis og annars ofbeldis.

Fram hefur komið í fjölmiðlum að tiltekinn starfsmaður hafi lagt fram kæru vegna framkomu annars starfsmanns til siðanefndar Háskóla Íslands en niðurstaða nefndarinnar lá fyrir í júlí 2018. Samkvæmt starfsreglum siðanefndar Háskóla Íslands eru skriflegar niðurstöður siðanefndar afhentar málsaðilum og sendar rektor til vitundar og varðveislu. Í kjölfar hverrar niðurstöðu siðanefndar metur rektor hvort tilefni sé til frekari aðgerða af hálfu Háskólans.

Rektor getur ekki tjáð sig efnislega um málefni einstakra starfsmanna eða ákvarðanir siðanefndar, sem eru trúnaðarmál. Rétt er að taka fram að Háskóli Íslands hefur, á undanförnum misserum, lagt áherslu á að bæta enn frekar ferla og úrræði til að bregðast við kvörtunum og tilkynningum um ofbeldi og áreitni af hvaða tagi sem er, enda verður slíkt aldrei liðið innan Háskóla Íslands.