Miklu máli skiptir að samtal þingmannanna sem var uppljóstrað af Báru Halldórsdóttur hafi átt sér stað á opinberu veitingahúsi. Þetta segir Ragnar Aðalsteinsson, annar lögfræðinga Báru, í kvöldfréttum RÚV.

Bára hefur verið boðuð fyrir héraðsdóm og verður málið tekið fyrir á mánudag í Héraðsdómi Reykjavíkur, dómhúsinu við Lækjartorg. Ekki er um kæru að ræða heldur beiðni um vitnaleiðslur og öflun sýnilegra sönnunargagna. Í ljósi atburða hefur Bára ráðið tvo lögmenn, þau Ragnar og Auði Tinnu Aðalbjarnardóttur héraðsdómslögmann, sem segja það vera mjög sérstakt hvernig hún var boðuð fyrir héraðsdóm.

Að sögn Auðar á mál eins og Báru engin íslensk fordæmi, hins vegar hafi Mannréttindadómstóll Evrópu dæmt slík mál. Ragnar bætir við að þónokkur tilvik hafi komið upp þar sem talið er að ríki hafi brotið gegn tjáningarfrelsi uppljóstrara með því að beita þá refsingu.

„Þetta eru kjörnir þingmenn sem tala saman og tala með þeim hætti að það er spurning hvort almenningur hafi ekki átt rétt á því að vita um hvað þeir töluðu og hvernig þeir töluðu,“ segir Ragnar. „Jafnvel spurning hvort það hafi verið skylt þeim sem heyrðu þetta að upplýsa fjölmiðla og láta þá fjölmiðla taka málið áfram eða láta það niður falla.“