Allt stefnir í að Valur muni missa besta framherja Pepsi deildarinnar frá sér á næstu dögum, Patrick Pedersen er nefnilega staddur í Moldavíu.

Samkvæmt öruggum heimildum 433.is er Pedersen í læknisskoðun hjá FC Sheriff Tiraspol þar í landi.

Ekki náðist í Börk Edvardsson formann knattspyrnudeildar Vals eða Ólaf Jóhannesson þjálfara liðsins við vinnslu fréttarinnar.

Um er að ræða lang stærsta félagið í Moldavíu en félagið hefur meðal annars tekið þátt í riðlakeppni Meistaradeildarinnar.

Ætla má að forráðamenn Sheriff Tiraspol hafi séð til Pedersen þegar liðið mætti Val í Evrópudeildinni í sumar.

Pedersen skoraði eitt mark í 2-1 sigri Vals á heimavelli en það dugði ekki til þar sem Sheriff fór áfram á marki skorað á útivelli, liðið vann leikinn á heimavelli 1-0.

Pederen var besti leikmaður Vals í sumar þegar liðið varð Íslandsmeistari annað árið í röð, þessi danski sóknarmaður skorðaði 17 mörk í 21 leik í deildinni.

Valsmenn fengu Garðar Gunnlaugsson til félagsins á dögunum en ef Pedersen mun fara þá er ljóst að Valur mun sækja sér annan sóknarmann.

Óttar Magnús Karlsson sem er í eigu Molde hefur æft með Val síðustu daga samkvæmt sömu heimildum, möguleiki er á að Óttar komi aftur til Íslands en hann var á láni hjá Trelleborg í Svíþjóð á þessu ári.