Um síðustu helgi átti írska knattspyrnuliðið Ballybrack FC frá Dublin að spila gegn Arklow Town í Leinster Senior League. Á föstudaginn tilkynnti liðið stjórnendum deildarinnar að einn leikmanna þess, Spánverjinn Fernando Nuno La Fuente, hefði látist í mótorhjólaslysi á fimmtudagskvöldið þegar hann var á leið heim af æfingu. Leiknum var því frestað og einnar mínútu þögn var fyrir alla leiki í deildinni um helgina til að minnast Fuente. En ekki var allt sem sýndist.

Ballybrack FC fékk fjölda samúðarkveðja frá öðrum írskum knattspyrnuliðum og málið fékk á marga. En Fuente var alls ekki dáinn og hafði alls ekki lent í mótorhjólaslysi. Samkvæmt frétt Irish Times kom í ljós að Fuente var við hestaheilsu heima á Spáni og hafði Ballybrack FC einfaldlega tilkynnt um andlát hans til að sleppa við að spila um helgina. Fuente yfirgaf liðið fyrir mánuði síðan og fór til Spánar.

Stjórn Ballybrack FC hefur nú staðfest að krísufundur hafi verið haldinn hjá félaginu og að háttsetur stjórnarmaður hafi verið leystur frá störfum. Írska ríkisútvarpið segir að það sé ritari félagsins sem hafi verið látinn taka pokann sinn.

„Hann er á Spáni. Guði sé lof. Það er það eina góða í þessari sögu. Þessi ungi piltur lést ekki í mótorhjólaslysi á fimmtudaginn. Hann virðist hafa farið heim til Spánar fyrir fjórum eða fimm vikum.“

Sagði David Moran, stjórnarformaður Leinster Senior League. Stjórn deildarinnar hafði birt dánartilkynningu í dagblöðum áður en upp komst um málavexti.

Stjórn Ballybrack FC hefur beðið Fuente afsökunar sem og Arklow Town FC og alla þá sem höfðu samband við félagið til að votta samúð sína.

Stjórn deildarinnar fundar í dag til að taka ákvörðun um hvernig verður brugðist við málinu og hvernig eigi að refsa Ballybrack FC.