Ragnar Davíð Bjarnason, sem hefur ítrekað komist í kast við lögin, hefur verið ákærður fyrir tvær sérstaklega hættulegar líkamsárásir sem báðar beindust að bræðrum í Garðabæ. Árið 2001 var hann dæmdur í þriggja og hálfs árs fangelsi fyrir tilraun til manndráps. Hann komst enn fremur í fréttir árið 2008 þegar hann var stunginn sjö sinnum í versluninni Bobby‘s kiosk í Kaupmannahöfn. Sú reynsla virðsti ekki hafa gert hann fráhverfan hnífum ef marka má ákæru gagnvart honum nú.
Ragnar Davíð er ákærður fyrir líkamsárás gegn bræðrum í Garðabæ þann 15. maí árið 2016. Samkvæmt ákæru skar hann þann yngri með hníf í andlit og í upphandlegg með þeim afleiðingum að hann hlaut þriggja sentimetra langan skurð á hægri kinn.
Þann eldri skar hann með hníf í framhandlegg og upphandlegg vinstra megin og beit hann í andltið, samkvæmt ákæru. Afleiðingar þessa voru að hann hlaut tíu sentimetra langan skurð á vinstri framhandlegg sem náði í gegnum vöðvafell og inn í vöðvabúk, sem sauma þurfti saman með sextán sporum. Hann hlaut jafnframt bitsár á kinn.
Líkt og fyrr segir var hann árið 2001 dæmdur fyrir tilraun til manndráps, en auk þess líkamsárás og árás á lögreglumann. Árið 2008 var hann svo dæmdur í átján mánaða fangelsi en ríflega 50 grömm af amfetamíni fundust á heimili hans í Breiðholti. Sá dómur var svo þungur þar sem hann rauf skilorð.
Það vakti talsverða athygli þegar Ragnar Davíð var stunginn í Kaupmannahöfn af eiganda verslunarinnar Bobby´s. Verslunareigandinn stakk hann sjö sinnum en samkvæmt fréttaflutningi þá var hann að verjast dólgslátum Ragnars. Þá var hann snúinn niður af Sæmundi Pálssyni, einnig þekktum sem Sæma Rokk, árið 2008 eftir að hafa ráðist inn á heimili hans og látið ófriðlega. Ragnar var þá í kókaínvímu eins og fram kom í frétt DV af málinu.
