Michael Douglas greindi frá því í spjallþætti í gærkvöldi að leikarinn Val Kilmer sé með krabbamein í hálsi. Þá sagði hann að útlitið væri ekki gott fyrir Kilmer.

Síðastliðin tvö ár hefur slúðurpressan fylgst grannt með spítalaheimsóknum Kilmer, sem er 56 ára, og velt sér upp úr því hvort hann væri alvarlega veikur. Til þessa hefur Kilmer ætíð neitað því að hann eigi við heilsufarslegt vandamál að stríða. Þrátt fyrir þrálátan orðróm.

Þetta kemur fram í Daily Mail í morgun. Þá segir að miðillinn hafi leitað eftir viðbrögðum frá talsmanni Kilmer sem kvaðst ekki tilbúinn að tjá sig um orð Douglas.

Val Kilmer Slúðurpressan hefur lengi velt sér upp úr því hvað sé að hrjá Kilmer sem er orðinn mjög horaður.

Þá sagði Douglas í viðtalinu:

„Kilmer er góður maður sem er að glíma við nákvæmlega sömu týpu af krabbameini og ég var með (krabbamein í tungunni.) Hugur minn er hjá honum en veikindin eru ástæða þess að Kilmer hefur látið lítið fyrir sér fara síðustu ár.“