Jose Mourinho, stjóri Manchester United, hafði góða hluti að segja eftir sigur liðsins á Young Boys í Meistaradeildinni í gær.
Mourinho var sérstaklega hrifinn af Diogo Dalot, leikmanni United sem spilaði sinn fyrsta leik eftir aðgerð.
Dalot er aðeins 19 ára gamall og þótti standa sig ansi vel í sínum fyrsta leik fyrir félagið.
,,Ég vil vera góður við Luke Shaw líka því ég held að þeir séu að spila eins vel,“ sagði Mourinho.
,,Diogo og Shaw spiluðu mjög, mjög vel. Við sköpuðum hættu frá þeim báðum. Þeir tóku þátt í hættulegustu sóknunum og vörðust líka vel.“
,,Þetta var fyrsti leikur Diogo eftir aðgerð. Þetta var góð frammistaða. Ég held að allir hafi séð gæðin hans og hann er 19 ára gamall og getur spilað fyrir Manchester United í meira en tíu ár.“
