Klukkan 00.44 í nótt var tilkynnt um eld í útihúsi í Saltvík í Kjós. Þarna logaði eldur í þaki svínabúsins Stjörnugrís. Greiðlega gekk að slökkva eldinn en hann hafði komið upp í mótor sem knýr loftræstingu hússins.

Um klukkan hálf fjögur í nótt var tilkynnt um hugsanlegt innbrot í bifreið við Flókagötu. Tveir menn með ennisljós voru þar að bogra við bifreið. Lögreglan brást að sjálfsögðu skjótt við og kannaði málið og upplýsti. Þarna reyndust vera blaðberar á ferð.

Brotist var inn í verslun í austurborginni í nótt en ekki liggur fyrir hverju var stolið. Einn ökumaður var handtekinn í nótt grunaður um ölvun við akstur.