Leiðtogi Verkamannaflokksins, Jeremy Corbyn, tók málið nýlega upp á þingi og benti á að það væri mjög áhugavert að stuðningsmenn Brexit, sem hafa gert Brexit að helsta baráttumáli sínu í lífinu, hafi um leið miklar áhyggjur af eigin fjármálum. Sem dæmi nefndi hann Jacob Rees-Mogg, þingmann íhaldsmanna. Mogg er harður stuðningsmaður Brexit og leiðtogi þeirra þingmanna íhaldsflokksins sem styðja Brexit. Hann er af efnuðu fólki kominn og auðgaðist sjálfur vel áður en hann sneri sér að stjórnmálum.
Fjárfestingarfélagið Somerset Capital Management, sem hann á hlut í, hefur nú stofnað fjárfestingarsjóð í Dublin á Írlandi en Írland verður áfram í ESB eftir Brexit. Í tengslum við skráningu sjóðsins hjá írskum yfirvöldum kom fram að hann telur að mikil áhætta fylgi Brexit.
Lord Nigel Lawson er einnig í skotlínunni en hann er af efnafólki kominn. Hann var fjármálaráðherra í stjórn Margaret Thatcher frá 1983 til 1989. Hann var formaður Vote Leave í aðdraganda Brexit kosninganna en samtökin börðust fyrir útgöngu úr ESB. Hann hefur nýtt sér rétt sinn sem borgari í ESB til að búa í öðru ríki, í þessu tilviki Frakklandi, og nú hefur komið fram að hann hefur sótt um dvalarleyfi í Frakklandi svo hann geti búið þar áfram eftir Brexit.
Ekkert hefur komið fram sem bendir til að þessir tveir og aðrir stjórnmálamenn sem hafa verið nefndir til sögunnar í þessu samhengi hafi gert neitt ólöglegt en hins vegar bendir fólk á siðleysi þeirra og tvískinnung í málinu.