Holger hvarf frá heimili sínu í Árósum í Danmörku þann 26. október og síðan hefur fjölskylda hans ekkert heyrt frá honum. Lýst hefur verið eftir honum í dönskum fjölmiðlum og var sú auglýsing ítrekuð nýlega en á föstudaginn bárust lögreglunni upplýsingar um að Holger hefði sést í Kaupmannahöfn. Fólk sagðist hafa séð hann í Tívólí og á Strikinu.
Lögreglan hafði áður fengið upplýsingar um að hann hefði farið til Kaupmannahafnar og hefði í hyggju að fara til Svíþjóðar. En þrátt fyrir að danska og sænska lögreglan hafi leitað hans hefur hann ekki fundist og ekkert hefur heyrst frá honum síðan í október.
TV2 hefur eftir talsmanni lögreglunnar að foreldrar hans séu mjög áhyggjufullir. Lögreglan telur að hann hafi látið sig hverfa af fúsum og frjálsum vilja en leitar hans samt sem áður.
Hann er 178 sm hár með stutt ljóst hár. Þegar hann sást síðast var hann í ljósbrúnum jakka eða frakka og ljósbrúnum flauelsbuxum. Hann var með svefnpoka meðferðis.