Valur spilar stórleik í Meistaradeild Evrópu í kvöld er liðið mætir Rosenborg í undankeppninni á Origo-vellinum.

Rosenborg er stærsta lið Noregs og þarf Valur að eiga mjög góðan leik til að eiga möguleika í kvöld.

Ólafur Karl Finsen, leikmaður Vals, hefur fulla trú á verkefninu og segir að Valur þurfi að slá Rosenborg út.

Ef ekki þá þurfa Valsmenn að ferðast til Andorra og spila í Evrópudeildinni og missir Óli þá af tónleikum Guns N’ Roses hér heima þann 24. júlí.

,,Brekkan getur verið brött. Við eigum alveg að geta tekið þetta finnst mér, þetta er bara 11 gegn 11. Pressan er á þeim og við gefum þeim bara leik og setjum allt í þetta,“ sagði Óli Kalli.

,,Ég ætla ekkert að segja því allir þessir leikir hafa verið drepleiðinlegir, maður hefur bara verið að hlaupa í vörn. Við tölum bara meira um það eftir leik.“

,,Svo eru peningar í húfi og svona og það er ekkert hægt að tala um það. Sumir verða bara litlir í sér en ég og Einar sjáum bara um peningana.“

,,Ef við komumst ekki áfram þá verðum við í Andorra þegar Guns N’ Roses verða á Laugardalsvelli. Það kemur ekkert annað til greina en að slá þá út.“

,,Leikurinn byrjar í 0-0 og það er alltaf tækifæri þegar það er fótboltaleikur. Við skoðuðum þá aðeins í gær og þeir líta mjög vel út og eru með öfluga leikmenn.“