Birkir Bjarnason spilaði 90 mínútur fyrir Ísland í dag er liðið mætti Króatíu í lokaleik riðlakeppninnar í Rússlandi.

Birkir var svekktur í leikslok eftir 2-1 tap og er liðið úr keppni, strákarnir þurftu að vinna leik kvöldsins.

Birkir meiddist sjálfur snemma leiks er hann fékk högg á nefið en það kom aldrei til greina að hætta leik.

,,Þetta er ótrúlega svekkjandi þegar við erum svona nálægt þessu, við vöðum í sénsum og fengum ótrúlega mörg tækifæri til að skora og ég átti sjálfur að skora.“

,,Það var mikið blóð og þannig, við reyndum að stoppa það og við gerðum það,“ sagði Birkir um meiðslin.

,,Ég heyrði aldrei neitt [um leik Argentínu og Nígeríu]. Við vissum að við þyrftum að vinna og það skiptir ekki miklu máli þegar við vorum ekki með sigurinn í höndunum.“

,,Mér finnst leikurinn hrikalega góður. Við höfum örugglega aldrei skapað svona mörg færi gegn Króötum, klárlega besti leikurinn með bolta.“

,,Við skulum gera okkur grein fyrir því að þetta var gríðarlega sterkur riðill og það var leiðinlegt að fá svona leik gegn Nígeríu þar sem við eigum að gera betur en við erum stoltir af því að hafa verið hérna.“