Stuðningsmenn Donald Trump hafa eiginlega verið tilbúnir til að styðja hann í öllu sem hann tekur sér fyrir hendur og fátt hefur haft áhrif á stuðning þeirra við forsetann. Trump hefur sjálfur stært sig af að hann geti staðið á götu úti í New York og skotið mann án þess að það hafi áhrif á stuðningsmenn hans. Nú er hins vegar spurning hvort Trump hafi gengið of langt með hörðum aðgerðum innflytjendaeftirlitsins gagnvart innflytjendum á landamærunum við Mexíkó þar sem börn eru tekin frá foreldrum sínum og geymd í sérstökum „geymslum“ við það sem margir kalla slæman aðbúnað. Yfirvöld telja aðbúnaðinn þó ágætan.

En kannski er eitthvað til í því sem Fox News segir: Forseti úr repúblikanaflokknum veit að hann er í vanda þegar hann missir stuðning íhaldsblaðsins The New York Post. Í leiðara blaðsins á sunnudaginn var forsetinn gagnrýndur harðlega fyrir nýja og harða stefnu í málefnum innflytjenda.

„Það er ekki aðeins að þetta líti skelfilega út í augum heimsins. Þette er hræðilegt. Að minnsta kosti 2.000 börn hafa verið rifin úr örmum foreldra sinna á sex vikum, nokkrum sinnum í bókstaflegri merkingu.“

Sagði leiðarahöfundur og bætti við:

„Skoðanakannanir voru farnar að benda til að repúblikanar muni kannski ekki tapa svo mörgum þingsætum í kosningunum í nóvember en það mun aftur fara í hina áttina ef þetta heldur áfram – og það með réttu.“

The Wall Street Journal, sem er í eigu Rupert Murdoch sem styður Trump, fylgdi í kjölfar The New York Post á mánudaginn með næstum jafn harðorðum leiðara.

„Eru repúblikanar að reyna að missa meirihluta sinn í fulltrúadeildinni í nóvember? Við höldum það ekki en það er erfitt að horfa framhjá innri deilum flokksins um innflytjendamál sem eru að verða að kosningamartröð um börn sem eru tekin frá foreldrum sínum.“