Alex Younger, yfirmaður MI6, segir að hann vonist til að fólk sem hafi aldrei látið sér detta í hug að það gæti starfað hjá leyniþjónustunni íhugi að sækja um. Hann segir starfið vera spennandi, mikilvægt og reyna á vitsmuni fólks.
Í auglýsingunni er boðskapurinn að kvikmyndirnar um James Bond séu fjarri raunveruleikanum hvað varðar störf leyniþjónustumanna.
MI6 þarf að ráða 800 nýja starfsmenn fram til 2021.
Meðal reynslumestu starfsmanna MI6 eru engir svartir, engir af asískum uppruna eða úr öðrum minnihlutahópum. Sem sagt aðeins hvítt fólk.
Af reynsluminni starfsmönnum MI6 eru aðeins sjö prósent úr minnihlutahópum.
Auk þess að sækjast eftir fólki úr minnihlutahópum innflytjenda vill MI6 gjarnan fjölga konum hjá stofnuninni.
Fram að þessu hefur sú krafa verið gerð til umsækjenda að báðir foreldrar þeirra séu fæddir í Bretlandi. Nú hefur þessari kröfu verið breytt og því er sóst eftir börnum innflytjenda til starfa.