Bandaríski leikarinn Bill Cosby verður dæmdur í fangelsi þann 24. September næstkomandi, tæpum fimm mánuðum eftir að hann var sakfelldur fyrir kynferðisbrot. Cosby, sem verður 81 árs í sumar, má búast við því að fá allt að tíu ára fangelsisdóm.

Þetta kemur fram í frétt AP-fréttastofunnar en lögmenn leikarans höfðu beðið dómarann í málinu, Steven O‘Neill, til að fresta dómsuppsögunni þar til í lok árs.

Cosby var sakfelldur fyrir þrjú brot og er refsiramminn fyrir þau brot sem hann var sakfelldur fyrir fimm til tíu ára fangelsi.

Það var þann 26. Apríl síðastliðinn sem Cosby var sakfelldur en síðan þá hefur hann dvalið í stofufangelsi á heimili sínu í Philadelphia. Hann hefur ekkert tjáð sig um sakfellinguna.

Cosby þarf að vera með ökklaband á sér og þá má hann ekki yfirgefa heimili sitt nema fá til þess leyfi frá dómara. Sakfellingin mun einnig gera það að verkum að Cosby fer á skrá yfir dæmda kynferðisbrotamenn.