„Við viljum þakka honum fyrir stuðninginn við íslenska landsliðið á Evrópumótinu,“ segir Hannes Freyr Sigurðsson, sem fer fyrir söfnun fyrir Adam Williams og konu hans Catherine sem geri þeim kleift að koma til landsins. Adam er 26 ára gamall lögregluþjónn frá London sem varð fyrir lífshættulegri hnífaárás í París þann 3. júlí síðastliðinn, eftir leik Íslands og Frakklands á Evrópumótinu.

Adam er stuðningsmaður íslenska liðsins, en árásarmaðurinn stakk hann tvisvar í kviðinn með steikarhníf. Adam er enn á sjúkrahúsi og verður frá vinnu næstu tvo mánuðina hið minnsta.

Hann kemur hingað til lands í boði Tólfunnar, fyrirtækja og velgjörðarmanna í október og fara þau Catherine meðal annars á leik á Laugardalsvelli þar sem Ísland mætir Finnlandi í undankeppni HM. Söfnun var hleypt af stokkunum síðasta föstudag í tilefni þessa.

Þegar hafa mörg fyrirtæki lagt söfnuninni lið og hafa hjónin fengið gefins farseðla hingað til lands, gistingu og fleira. Adam hefur óskað eftir því að helmingur þeirra fjármuna sem safnast verði gefinn til innlendra góðgerðarmála, nánar tiltekið til Barnaspítala Hringsins og til Landsbjargar.

Hannes segir að það sé helst af Adam að frétta að hann sé enn á sjúkrahúsi, en bataferlið gangi ágætlega. Hann sé byrjaður að ganga stuttar vegalengdir, en þurfi góðan tíma til að jafna sig eftir árásina.
Þeim sem vilja aðstoða Adam og Catherine er bent á söfnun Tólfunnar.

Reikningsnúmerið er 515-14-411483 og kennitalan er 521113-0650 en reikningurinn er á nafni Tólfunnar.