Leikarinn Jóhannes Haukur Jóhannesson fer með hlutverk í The Innocents, yfirnáttúrulegum spennuþáttum frá Netflix sem frumsýndir verða í ágúst á streymiveitunni.
Samkvæmt IMDb síðu þáttarins fer Jóhannes með hlutverk manns að nafni Steinar, en leikarinn sést áberandi í nýbirtri stiklu þáttarins og deilir þar rammanum með ástralska leikaranum Guy Pearce, sem margir hverjir kannast við úr kvikmyndunum L.A. Confidential, Memento og Iron Man 3, svo nokkrar séu nefndar.
The Innocents segir frá unglingunum Harry og June sem hafa strokið frá heimilum sínum til þess að vera saman. Tilvera beggja tekur enn stærri breytingu þegar June uppgötvar eiginleika sína sem hamskiptir. Þá kemst hún í kynni við dularfullan prófessor sem fræðir hana um að fleiri séu til með svona krafta og stendur unga parið frammi fyrir erfiðri ákvörðun, um hvort eigi að halda saklausa draumi sínum á lífi eða sætta sig við þessar stórbreytingar í lífum þeirra og hætta á allt.
Jóhann slær á létta strengi á Facebook-síðu sinni og skrifar: „Minns er bara helling! Fyrsti treiler af Netflix seríunni sem ég er í og verður frumsýnd world wide í ágúst. Ég og Guy Pearce erum þarna í góðum fíling (og fleiri líka, en aðallega ég og Guy Pearce…. sem nú er vinur minn. Mjög góður vinur minn. Einn af mínum nánustu. Just saying).“
Þættirnir verða átta að talsins, en stikluna má sjá hér að neðan.
[youtube https://www.youtube.com/watch?v=6XshabV0010]
