Fjölmiðlamaðurinn Helgi Seljan gagnrýnir orð Agnes M. Sigurðardóttir, biskup Íslands, um stolin gögn og segir að umfjöllun Kastljóss um barnaníðinginn Karl Vigni Þorsteinsson hafi verið að hluta byggð á slíkum gögnum. Agnes lét í viðtalið við Morgunblaðið þau orð falla að henni þætti það ekki ekki siðferðilega rétt að „stela gögnum og fara á bak við fólk til að afhjúpa mál og leiða sannleikann í ljós“.

Sjá einnig: Biskup Íslands: Ekki réttlætanlegt að stela gögnum til að afhjúpa mál

Helgi Seljan segir að enginn myndi kalla það siðbót að fjalla ekki um mál Karls Vignis:

Umfjöllunin sem loks varð til þess að stöðva kynferðisbrot þessa manns – og að endingu fangelsa hann, var að hluta byggð á gögnum sem biskup Íslands kallar „stolin“. Þau gögn sýndu meðal annars fram á það hvernig kirkjan sem hún veitir forstöðu, tók undir sinn verndarvæng og verðlaunaði mann sem þá þegar hafði gengist við kynferðisbrotum gegn börnum, og greint hafði verið frá opinberlega. Þá ákvörðun að fjalla ekki um mál Karls Vignis, myndi enginn kalla siðbót,

segir Helgi. Vísar Helgi til þess þegar Karl Vignir fékk viðurkenningu frá Áskirkju fyrir störf sín í þágu kirkjunnar sem sjálfboðaliði þrátt fyrir ítarlega umfjöllun bæði DV og Morgunblaðsins árið 2007 um brot hans. Karl Vignir var nafngreindur í báðum blöðum en þrátt fyrir það hlaut hann viðurkenninguna árið 2012. Karl Vignir Þorsteinsson var dæmdur haustið 2013 í sjö ára fangelsi fyrir gróf kynferðisbrot gegn drengjum.