„Fólk talar bara blátt áfram eins og það besta í heimi sé að vera Íslendingur. Fólk fattar ekki að ég er jafn hvítur og ég er svartur. Ég lít ekki á mig sem eitt eða neitt. Ég vil bara fá að vera friði með það hvernig ég lít út. Það er þessi hugsunarháttur sem þarf að laga. Fólk á að fá að vera stolt af því hvaðan það kemur, hver saga þess er. Við erum ekki í keppni um hver sé mesti Íslendingurinn,“ segir Unnsteinn Manuel Stefánsson tónlistarmaður í viðtali í Fréttablaðinu í dag.

Pistill sem Unnsteinn skrifaði í vikunni vakti mikla athygli, en þar svaraði hann þeim sem fundu að því að hann væri stigakynnir Íslands í Eurovision í ljósi þess að hann er dökkur á hörund. Nokkur misgáfuleg ummæli voru látin falla þegar Unnsteinn birtist á skjám landsmanna, til dæmis þessi hér: „What. Á negri að vera andlit Íslands út á við? Svona svipað og Íslendingur væri andlit Kína út á við. […] Ætti að skipta þessum kynnir út fyrir Íslending.“

Sjá einnig:
„Ég nenni ekki að umræðan um að ég sé stigakynnir í Eurovision fari að snúast um það hvernig ég er á litinn“
Í viðtalinu í Fréttablaðinu ræðir Unnsteinn þessi mál meðal annars. Hann segir að áreitið sé vissulega alvarlegt en þó séu þetta fáir einstaklingar hér á landi sem stundi kynþáttaníð. Hann vill að stjórnmálamenn axli sína ábyrgð.

„Mér finnst verst þegar það er þögn. Það er klassísk íslensk lending. Þegar einhver fer út af sporinu á ættarmótinu verða allir meðvirkir og það er ekki hægt að ræða hlutina. Þá er líka hætta á að stjórnmálamenn notfæri sér ástandið og þegi gagngert til að halda möguleikanum opnum á að ala á útlendingahatri í leit að atkvæðum. Rétt eins og gerðist í Bretlandi í borgarstjórakosningum. Nema það sprakk í andlitið á þeim, sem er gott,“ segir hann og bætir við að grípa þurfi til aðgerða til að uppræta fordóma í samfélaginu.

„Það sem mér finnst verst núna er uppgangur múslimahatara sem eru að fara af stað með einhvers konar aktívisma. Það er á ábyrgð ríkisstjórnarinnar að gera eitthvað. Það gengur ekki að múslimar fái morðhótanir og enginn segi neitt,“ segir hann meðal annars í viðtalinu

Hér má lesa viðtalið við Unnstein í Fréttablaðinu í heild sinni