„Það er samt ódýrara að leigja en að gera út kellingu. Það er staðreynd,“ segir leikarinn Gunnar Jónsson í samtali við DV. Gunnar var gestur Magnúsar Inga Magnússonar, betur þekktur sem Maggi í Texasborgurum, í þættinum „Eldhús Meistaranna,“ sem sýndur var á sjónvarpsstöðinni ÍNN í síðustu viku. Þar greindi Gunnar meðal annars frá því að hann „leigði konur“ í Reykjavík. Vill hann ekki að orð hans séu tekin alvarlega.

Umræðan spratt upp í þættinum þegar Maggi var að steikja gellur. Maggi spurði hvort að Gunnar væri „eitthvað mikið í þeim“ og sagðist hann ekki elda þær mikið. Maggi svaraði þá:

„En ég átti við hinar gellurnar. Kellingarnar,“ sagði Maggi hátt og Gunnar sagðist hafa vitað það.

Því næst fóru þeir að ræða tilhugalíf Gunnars. Maggi spurði leikarann hvort að hann væri „skæður í kellingunum.“ Gunnar svaraði að það væri aðeins byrjað að „hjaðna.“ Að því sögðu bætti Gunnar við:

„Maður er hættur að nenna eltast við þetta. Ég bara búinn að sjá að það er ódýrara að leigja, heldur en að vera með kellingu.“

Maggi spurði þá hissa hvernig slíkt færi fram og útskýrði Gunnar að hægt sé að finna símanúmer í blöðum „hringir og færð bara heimsent.“

Maggi sagðist halda að slíkt væri aðeins hægt erlendis. Gunnar var fljótur að svara kokknum og leiðrétta hann.

„Við erum að tala um Ísland. Reykjavík, borg siðmenningarinnar.“

DV hafði samband við Gunnar vegna málsins og bað hann um að útskýra orð sín í þættinum. Gunnar segir að um fíflalæti hafi verið að ræða. Hann og Maggi hafi verið að slá á létta strengi og að enginn þurfi að taka orð hans alvarlega.

„Þetta voru bara létt fíflalæti hjá strákunum í eldhúsinu,“ segir Gunnar og bættir svo við:

„Það er samt ódýrara að leigja en að gera út kellingu. Það er staðreynd.“

Gunnar segir enn fremur að hann hafi starfað sem dyravörður í nokkur ár og að það hefði ekki farið fram hjá honum, sem næturstarfsmanni í miðbæ Reykjavíkur, að vændi sé stundað í Reykjavík.

Gunnar segist ekki stunda það að kaupa vændi. Aðspurður hvort að hann hafi einhvern tíman keypt vændi segir Gunnar: „Ekki á Íslandi.“

Hér má sjá myndskeiðið úr þættinum.