Jón Baldvin Hannibalsson, fyrrverandi utanríkisráðherra, segir að hagsmunum Íslands sé í dag betur borgið utan Evrópusambandsins en innan þess. Þetta kom fram í máli Jóns Baldvins á Morgunvaktinni á Rás 1 í morgun.

Jón var harður talsmaður þess eftir hrun að Ísland gengi í Evrópusambandið, en hann hefur nú endurskoðað afstöðu sína til þess. „Við göngum ekki inn í brennandi hús núna. Slökkvið fyrst eldana,“ sagði Jón Baldvin meðal annars.

„Hér talar maður sem var harvítugasti talsmaður þess að við eftir hrun gengjum í samfélag lýðræðisríkja, Evrópusambandið. Ég hef endurskoðað þá afstöðu. Einfaldlega vegna þess að þegar ég horfi á Evrópu, þá sé ég Evrópusamband sem er nánast í sjálfsmorðsleiðangri vegna þess að pólitíska forystan hefur algjörlega brugðist – og það er kreppa eftir kreppu eftir kreppu. Peningasamstarfið er byggt á röngum grunni og stenst ekki. Það mun ekki standast nýtt áhlaup,“ sagði Jón Baldvin og bætti við að stefna Evrópusambandsins gegn þeim ríkjum sem fóru hvað verst út úr hruninu; Grikklandi, Kýpur, írlandi, Spáni og Portúgal væri rugl.

„Tómt efnahagslegt rugl! Og ekki boðleg. Frammistaða Evrópusambandsins gagnvart þeirri áraun sem fylgja flóttamannahræringum um allan heim sýnir algjört pólitískt forystuleysi, alltaf viðbrögð við atburðum eftir á, og skammarlega lítilmennsku.“