Fulham hefur samkvæmt enskum miðlum hafið tilraun til að fá Arne Slot sem næsta knattspyrnustjóra félagsins eftir brottför Marco Silva.

Slot var rekinn frá Liverpool í síðustu viku, aðeins ári eftir að hafa stýrt félaginu til Englandsmeistaratitils. Tímabilið sem fylgdi varð hins vegar erfitt og endaði Liverpool í fimmta sæti úrvalsdeildarinnar, sem varð til þess að leiðir skildu.

Fulham er nú í leit að nýjum stjóra eftir að Marco Silva yfirgaf félagið eftir fimm ár við stjórnvölinn. Portúgalinn hefur samkvæmt fréttum samþykkt þriggja ára samning við Benfica.

Þrátt fyrir áhuga Fulham er talið ólíklegt að Slot taki starfið. Heimildir herma að Hollendingurinn vilji bíða eftir stærra verkefni og sé ekki líklegur til að samþykkja tilboð frá Lundúnafélaginu að svo stöddu.

Brottför Silva tengist einnig stærri hreyfingum á stjóramarkaðnum. Benfica þarf nýjan stjóra þar sem José Mourinho er sagður á leið til Real Madrid. Sú ráðning er þó sögð ráðast af forsetakosningum hjá spænska stórliðinu sem fara fram um helgina.

Fulham heldur því áfram leit sinni að nýjum stjóra, en ljóst er að félagið ætlar sér að skoða metnaðarfulla kosti áður en ákvörðun verður tekin.