Afli Ísfélagsins fer í endurvigtun hjá Fiskmarkaði Þórshafnar, fyrirtæki í eigu forstjóra Ísfélagsins, eftir að að vigtunarleyfi Ísfélagsins var afturkallað. Líkt og Eyjan fjallaði um í vikunni afturkallaði Fiskistofa vigtunarleyfi Ísfélagsins á Þórshöfn í hálft ár frá og með 1. júní þar sem ekki hafi verið gengið úr skugga um að vigt sem var notuð til endurvigtunar á þorski í janúar í fyrra uppfylli skilyrði löggildingar.
Sjá frétt: Ísfélagið missir vigtunarleyfi í hálft ár
Heimildarmenn Eyjunnar sem þekkja til á Langanesi segja að eftir að vigtunarleyfið var afturkallað hafi afli af bát Ísfélagsins endurvigtaður af Fiskmarkaði Þórshafnar, þaðan er aflinn sendur í vinnslu. Samkvæmt fyrirtækjaskrá Skattsins er stjórnarmaður og raunverulegur eigandi þess Stefán Friðriksson, forstjóri Ísfélagsins.
Ákvörðun Fiskistofu hefur vakið mikla athygli þar sem talað er um að „átt hafi verið við vigtina“ með þeim afleiðingum að hún vigtaði alltaf um 6 til 7 prósentum minna en aðrar vigtir.
Ísfélagið fór fram á aðra rannsókn á málinu til að hægt sé að koma sjónarmiðum fyrirtækisins á framfæri. Þá sé ákvörðunin um að afturkalla vigtunarleyfið íþyngjandi fyrir Ísfélagið: „Fyrirhuguð stjórnvaldsákvörðun Fiskistofu telst verulega íþyngjandi fyrir Ísfélagið, auk þess sé deilt um málsatvik, þ.á.m. forsendur fullyrðinga Fiskistofu sem eru ekki alls kostar ljósar,“ segir í athugasemdum Ísfélagsins til Fiskistofu.
