Eddie Howe, knattspyrnustjóri Newcastle United, viðurkenndi eftir 1-1 jafntefli liðsins gegn Nottingham Forest að það hefði verið sárt að sjá Elliot Anderson skora jöfnunarmark Forest gegn sínu gamla félagi.
Anderson, sem er uppalinn hjá Newcastle, var seldur til Nottingham Forest sumarið 2024 í félagaskiptum sem voru metin á um 35 milljónir punda. Sala hans var hluti af því að Newcastle þurfti að uppfylla reglur ensku úrvalsdeildarinnar um fjárhagslegt jafnvægi og sjálfbærni, svokallaðar PSR-reglur.
Howe sagði eftir leikinn að félagið hefði aldrei viljað missa miðjumanninn unga.
„Þetta var eitthvað sem við sáum eftir um leið og við gerðum það. Við vissum að þetta yrðu mjög sársaukafull félagaskipti,“ sagði Howe.
„Við höfðum í raun ekkert val, en þetta er líklega tregafyllsta sala sem ég mun nokkurn tímann samþykkja. Við vissum hversu góður leikmaður hann er.“
Howe bætti við að Anderson hefði sýnt mikla hæfileika á æfingum árum saman og verið farinn að festa sig í sessi hjá Newcastle áður en hann var seldur.
„Það særði mig virkilega að sjá hann skora gegn okkur í dag, en hann á eftir að eiga frábæran feril. Hann er líka frábær karakter,“ sagði Howe.
