Kona sem giftist föður sínum og vakti heimsathygli í kjölfarið hefur nú stigið fram í viðtali um stöðu sína í dag. Hún vandar líffræðilegum föður sínum ekki kveðjurnar og segir hann hafa misnotað stöðu sína gróflega gagnvart henni á sínum tíma.

Samantha Kershner var 17 ára þegar hún hitti líffræðilegan föður sinn, Travis Fieldgrove, í fyrsta sinn.

Það gerðist eftir að Samantha varð forvitin um uppruna sinn og aðstoðaði móðir hennar hana að komast í samband við Travis. Óhætt er að segja að eitt hafi leitt af öðru í sambandi þeirra feðgina og áður en langt um leið voru þau farin að stunda kynlíf reglulega.

Í september 2018 gengu þau síðan í hjónaband, en um svipað leyti hófu yfirvöld í Nebraska rannsókn á málinu vegna gruns um sifjaspell.

Málið vakti mikla athygli. Fieldgrove var dæmdur í fangelsi í janúar 2020 eftir að hafa játað sakargiftir um tilraun til sifjaspella. Á sama tíma gerði Kershner samkomulag við saksóknara sem varð til þess að ákæra gegn henni var felld niður.

Í dag segist Kershner ekki hafa nein samskipti við föður sinn. „Alls ekki. Ég tala við engan úr þeirri hlið fjölskyldunnar,“ segir hún í viðtali við Daily Mail.

Hún segir jafnframt að hann hafi nýtt sér reynsluleysi hennar sem óharðnaður unglingur og beitt hana blekkingum. „Ég er á miklu betri stað núna,“ bætir hún við.

Hún býr nú með dóttur sinni og unnusta í dreifbýli í Nebraska og hefur lýst núverandi unnusta sínum sem yndislegum manni. Hún segist hlakka til að gifta sig á næsta ári og segir hann koma vel fram við hana og dóttur hennar.

Á meðan hefur Fieldgrove haldið áfram að komast í kast við lögin. Hann var dæmdur í þriggja ára fangelsi í nóvember 2025 fyrir að hafa hótað ofbeldi, en hann hafði áður verið sakfelldur fyrir sambærileg brot, meðal annars árið 2021 og 2014.

Samkvæmt gögnum á hann að baki langa sakaskrá sem nær aftur til tíunda áratugarins og inniheldur meðal annars þjófnað, heimilisofbeldi og akstur undir áhrifum.

Þá kemur fram í dómsskjölum að hann var árið 1999 ákærður fyrir kynferðisbrot gegn 15 ára stúlku. Málinu lauk síðar með samkomulagi sem hann gerði við saksóknara og afplánaði hann fangelsisdóm vegna málsins.

Rannsókn á sambandi þeirra Kershner og Fieldgrove leiddi síðar í ljós að faðernispróf staðfesti með 99,999 prósenta líkum að hann væri líffræðilegur faðir hennar, þrátt fyrir að hann væri ekki skráður sem slíkur á fæðingarvottorði hennar þegar þau gengu í hjónaband.