Íslenska kvennalandsliðið leikur gegn Úkraínu í afar mikilvægum leik í undankeppni HM annað kvöld.

Leikurinn fer fram á Laugardalsvelli og þarf Ísland að sækja þrjú stig í baráttunni um þriðja sæti undanriðilsins, en það hefur mikið að segja um framhaldið í umspili um sæti á HM. Þangað hefur Ísland aldrei komist áður.

„Ég er spennt. Það er gaman að spila á heimavelli fyrir framan okkar fólk og á móti Úkraínu. Þær eru með hörkulið, mjög aggresívar og verður mjög mikilvægt fyrir okkur að vera klárar í þetta verkefni. Við þurfum að spila vel út úr pressunni þegar þær stíga upp. Við erum að spila á móti virkilega góðu liði,“ sagði Glódís Perla Viggósdóttir landsliðsfyrirliði á blaðamannafundi í dag.

„Við erum með markmið um að komast á HM og það gefur okkur bestu möguleikana að ná öðru eða þriðja sæti. Við munum gefa allt í þennan leik og þetta eru leikirnir fyrir fram sem við horfum í að ná í stig. Þetta er gríðarlega mikilvægur leikur.“

Leikurinn hefst klukkan 18:30 annað kvöld. Ísland mætir svo Evrópumeisturum Englands, einnig hér á landi, á laugardag og ljóst er að það verður allt öðruvísi verkefni.