Mickens, sem er 34 ára, var ákærður fyrir alvarlega líkamsárás sem leiddi til dauða Sheilu þann 8. október 2023. Hann játaði sök og fékk 40 ára dóm fyrir vikið.
Mickens hélt því upphaflega fram að Cuevas hefði orðið fyrir árás frá hundi hans, Soldier, eftir að hann hringdi í neyðarlínuna og tilkynnti að hún andaði ekki.
Hundurinn var í kjölfarið tekinn af dýraeftirlitinu á svæðinu og aflífaður, en rannsókn leiddi síðar í ljós að dýrið tengdist hvorki áverkum hennar né dauða.
Dómurinn tekur einnig til eldri brota en með árásinni rauf hann skilorð dóma sem hann hafði áður hlotið fyrir líkamsárás, þar á meðal gegn fyrrverandi kærustum sínum. Bættust þannig 20 og 15 ár við 40 ára dóminn sem hann hlaut vegna dauða Sheilu.
Við dómsuppkvaðninguna stigu nokkrar konur fram í réttarsal og lýstu reynslu sinni af Mickens. Lýstu þær meðal annars stjórnsemi hans, kynferðisofbeldi og langvarandi andlegu ofbeldi.
Fjölskylda Cuevas ávarpaði einnig dóminn. Þar kom meðal annars fram að enginn fangelsisdómur gæti fært henni Sheilu aftur, en að nauðsynlegt væri að hann sætti ábyrgð og tæki afleiðingum gjörða sinna.
Að sögn saksóknara var Cuevas afburðanemandi með framhaldsgráðu, en hún hefði flækst inn í ofbeldissamband sem hún átti erfitt með að losna úr.
Mickens var þekktur innan markaðsfyrirtækisins IM Academy, þar sem hann starfaði undir nafninu Cash Cartier. Hafði hann það hlutverk að lokka ungt fólk inn í þjálfunarteymi sitt með loforðum um miklar tekjur. Hann er um tíma sagður hafa þénað allt að tíu milljónir króna á mánuði, en um það leyti sem Sheila lést var farið að halla undan fæti hjá honum.
