Lögregla og björgunarsveitir hafa haft í mörg horn að líta vegna vonskuveðurs sem gengið hefur yfir suðurhelming landsins í dag.

Lokanir eru í gildi á Hellisheiði, Þrengslum, Holtavörðuheiði og hringveginum frá Markarfjóti að Öræfasveit. Eru vegfarendur hvattir til að fylgjast með nýjustu upplýsingum um færð á vegum á vefnum Umferdin.is.

RÚV greinir frá því að rúta hafi fokið út af veginum við Kjalarnes eftir hádegið í dag og endað á hliðinni. Þrír voru um borð í rútunni og komust þeir út í gegnum topplúgu rútunnar. Í frétt RÚV kemur fram að allir hafi virst óslasaðir.

Þá fauk bíll út af veginum í námunda við Borgarnes. Enginn slasaðist í óhappinu en ökumaðurinn var þó færður til skoðunar á heilsugæslu.