Þingmaðurinn Suhas Subramanyam varpaði sprengju á dögunum þegar hann fullyrti að dánarbú níðingsins Jeffrey Epsteins hafi greitt sáttagreiðslu til konu sem sakaði Donald Trump Bandaríkjaforseta um kynferðisbrot gegn sér.

Vísaði þingmaðurinn til vitnaskýrslu Richards Kahn, sem er fyrrverandi endurskoðandi Epstein. Kahn gaf skýrslu fyrir luktum dyrum á dögunum í tengslum við birtingu Epstein-skjalanna alræmdu. Má í skjölunum finna ásakanir í garð Donalds Trump Bandaríkjaforseta, þar með talið um kynferðisbrot. Eftir að Kahn gaf skýrslu ræddi Subramanyam við fjölmiðla og sagði:

„Við getum ekki farið út í smáatriði um allt sem kom fram, en við komumst meðal annars að því að það var annar þjóðhöfðingi sem mun hafa átt í fjármálaviðskiptum við Jeffrey Epstein. Sá var ekki bandarískur. Og svo fékk önnur manneskja, sem hafði ásakað Donald Trump, greidda sátt úr dánarbúi Jeffrey Epsteins. Við höfum staðfest það.“

Ekki er víst hvaða konu er um að ræða, en þær hafa nokkrar sakað forsetann um brot gegn sér. Margir velta því þó fyrir sér hvort hér sé um að ræða konu, sem aldrei hefur verið nafngreind, sem heldur því fram að Trump hafi reynt að þvinga hana til að veita sér munnmök á níunda áratug síðustu aldar. Hún hafi verið unglingur á þessum tíma, um 13–15 ára, og hafi Epstein komið henni í kynni við Trump. Ásakanir konunnar voru ekki birtar fyrr en nýlega eftir harða baráttu þingmanna demókrata sem töldu að dómsmálaráðuneytið hefði haldið eftir skjölum sem tengdust forsetanum. Eftir mikið þras gekkst ráðuneytið loks við því að skjöl vantaði, en sagði það hafa gerst fyrir mistök þar sem skjölin hafi ranglega verið merkt sem tvírit. Varaði dómsmálaráðuneytið þó við því að skjölin kynnu að innihalda ofsafengnar og ósannar ásakanir gegn forsetanum og að allar yfirlýsingar ónefndu konunnar væru með öllu tilhæfulausar.