Harry Maguire leikmaður Manchester United og enska landsliðsins er staddur hér á landi og dvaldi á The Retreat Hotel hjá Bláa lóninu í gær.

The Retreat Hotel er eitt dýrasta hótel landsins en það er lítið mál fyrir Maguire að rífa upp kortið enda þénar hann 35 milljónir á viku hjá United.

Egill Einarsson, betur þekktur sem Gillz var staddur á hótelinu á sama tíma og Maguire og fékk mynd af sér með honum.

Maguire hefur fengið helgarfrí en United er úr leik í enska bikarnum og því engin dagskrá hjá félaginu um helgina.

Áhrifavaldurinn og hlaðvarpsstjórnandinn, Gurrý Jónsdóttir, er unnusta Gillz og var með í för. Hún virtist ekkert sérstaklega sátt með sinn mann að áreita Maguire í fríi sínu.

„Egill endar á lausu eftir að hafa ónáðað Harry,“ skrifar Gurrý í færslu á Instagram þar sem hún sést taka mynd af Agli og Maguire saman.