Listahátíðin State of the Art stendur nú yfir í Reykjavík en þetta er annað árið sem hátíðin er haldin. Að hátíðinni standa Bjarni Frímann Bjarnason, Bergur Þórisson, Magnús Jóhann Ragnarsson og Sverrir Páll Sverrisson.

Sverrir segir að hugmyndin að hátíðinni hafi sprottið eftir tónleikaröð sem Magnús hélt árið 2023, sem Bergur hafi einnig komið að og í framhaldinu hafi komið upp hugmynd um að búa til hátíð með tónlist sem þá langaði sjálfa að heyra og flytja.

„Okkur langaði að búa til eitthvað nýtt og setja anga úr mismunandi áttum í tónlistinni í einhvern bræðing.“

Sverrir segir að það sé í raun enginn þráður í þeirri tegund tónlistar sem sé á hátíðinni, heldur komi tónlistin úr öllum áttum og ólíkum tegundum sé einnig blandað saman. Þetta megi til dæmis sjá í viðburði sem haldinn verður í kvöld í Iðnó þar sem indísveitin Supersport! og Flóni halda saman tónleika.

„Þetta eru ekki tónleikar eins og margir gætu haldið, að fyrir hlé sé Supersport! og eftir hlé sé Flóni, heldur eru þau búin að vera æfa saman og eru að spila lög hvers annars. Það er að fara að vera indírokk stemming undir Trappa eða OMG með Flóna og á móti er hann að fara að „riffa“ yfir Supersport! lög. Þannig að það er líka það sem okkur finnst gaman, að skeyta saman einhverjum artistum sem ólíklega væru annars að vinna saman, það er líka ein pælingin með hátíðinni.“

Sverrir segir að hátíðin hafi fengið góð viðbrögð, uppselt hafi verið á marga viðburði og greinilegt sé að fólk sé spennt fyrir því að sjá eitthvað nýtt og fjölbreytt. Þó séu einhverjir miðar eftir á tónleika kvöldsins í Iðnó auk þess sem miðar séu til á dansverkið See Instructions sem flutt verður á sunnudag í TBR, húsnæði Tennis og Badmintonfélags Reykjavíkur.

Nánari upplýsingar um hátíðina má finna á https://www.stateoftheartfestival.is/