John Terry, fyrrum fyrirliði Chelsea og goðsögn félagsins, er enn að bíða eftir því að fá tækifæri sem aðalþjálfari.

Terry hefur starfað sem aðstoðarþjálfari eftir að ferlinum innan vallar lauk og sinnti því starfi síðast hjá Aston Villa.

Terry hefur reynt og reynt að fá tækifæri sem aðalþjálfari án árangurs en hann segist tilbúinn í þá áskorun sem fyrst.

Englendingurinn viðurkennir að hann gæti gefist upp á einhverjum tímapunkti ef hann fær ekki sénsinn á næstu mánuðum eða árum.

,,Ég er enn jafn ástríðufullur og auðvitað vil ég verða aðalþjálfari. Ég er að horfa á alla leiki, ég horfi á þá aftur og er einnig á námskeiðum. Ég eyði svo miklum tíma í að bíða eftir þessu tækifæri,“ sagði Terry.

,,Því lengur sem þetta tekur þá eru meiri líkur á að ég segi stopp og einbeiti mér að öðrum hlutum. Ég hef verið fyrirliði Chelsea, fyrirliði Englands og náð árangri. Ég skil ekki af hverju ég fæ ekki tækifærið, ég skil það ekki.“

,,Ég tel að enskir þjálfarar fái ekki sömu tækifærin og aðrir, við lútum í lægri hlut fyrir erlendum þjálfurum sem hafa náð árangri í deildum sem eru ekki þær bestu í Evrópu.“