Eftir að hafa hampað reykingum áratugum saman og sveipað þær ákveðnum glamúr, eru Frakkar nú að snúa baki við þeim með nýju reykingabanni sem er það umfangsmesta fram að þessu.

Sígarettur voru ekki bara sígarettur í Frakklandi, þær voru ákveðin yfirlýsing, daður og uppreisn. En fljótlega verður gengið hart fram gegn reykingafólki því 1. júlí taka nýjar reglur varðandi reykingar gildi.

Samkvæmt nýju reglunum verður óheimilt að reykja nær alls staðar á almannafæri þar sem börn geta verið, þar á meðal eru strendur, almenningsgarðar, garðar, leikvellir, íþróttavellir, við skólainnganga og á biðstöðvum strætisvagna.

The Independent skýrir frá þessu og segir að þegar Catherine Vautrin, heilbrigðisráðherra, kynnti nýju reglurnar hafi hún sagt að það verði að sjá til þess að tóbak sé ekki til staðar þar sem börn séu. „Rétturinn til að reykja, honum lýkur þar sem réttur barna til að anda að sér fersku lofti hefst,“ sagði hún.

Sekt upp á sem nemur um 20.000 íslenskum krónum mun liggja við brotum á þessum nýju reglum.