Umrædd síbrotakona var í fréttum fyrir skömmu eftir átök við starfsmann verslunarinnar Nordic Market – og í vetur fyrir að stela kettinum Diego. Hún er sögð halda nágrönnum sínum í fjölbýlishúsi við Bríetartún í heljargreipum ofbeldis, þjófnaða og skemmdarverka, og er þá ónefnt stöðugt hávaðaónæði um nætur.
Jón opnar sig um ástandið í pistli á Vísi og segir að á morgun muni dóttir hans missa húsnæðið.
„Dóttir mín er fíkill. Og á morgun ætla Félagsbústaðir að láta fleygja henni út á götu. Ástæðan mun vera húsaleiguskuld. Mér skilst að upp á síðkastið hafi hún hreinlega neitað að greiða leiguna. Ég get raunar vel skilið það: Bríetartún 20 getur ekki kallast mannabústaður,“ segir hann.
„Íbúarnir í þessum stigagangi búa við stöðugan ótta og öryggisleysi. Á sínum tíma komu Félagsbústaðir upp öryggismyndavélum í stigaganginum, en einn íbúinn, er löngu búinn að klippa á allar leiðslur sem að þeim liggja. Íbúinn er vel þekkt síbrotakona, sem veður vopnuð um stigaganginn og axarför og aðrar skemmdir eftir hana má sjá hér og hvar, m.a. á hurðinni að íbúð dóttur minnar. Dyrnar eru reyndar svo laskaðar eftir ítrekuð innbrot, að í íbúðin stendur nánast opin.
Frá því að Félagsbústaðir úthlutuðu þessari konu íbúð í húsinu, hefur hún valdið öðrum íbúum stöðugri skelfingu með geðofsa sínum, síendurteknum skemmdarverkum og innbrotum bæði í aðrar íbúðir í húsinu og geymslur í sameign hússins.“
„Meðal afreka hennar má telja innbrot til dóttur minnar fyrir rúmum tveimur árum. Þá var hún í fylgd með einhverjum karlkyns félögum sínum, sem nauðguðu dóttur minni „í öll göt“ svo notuð séu hennar eigin orð, misþyrmdu henni og skildu við hana svo hart leikna að það leið langur tími, mögulega sólarhringur eða meira, hélt hún sjálf, þangað til hún komst til sæmilegrar meðvitundar,“ segir hann og bætir við að dóttir hans hafi kært árásina, eða reynt það.
„En ég hef ekki neinar spurnir af því að þeirri kæru hafi verið sinnt. Síbrotakonan hefur auðvitað verið kærð til lögreglu miklu oftar, enda líka verið staðin að ýmsum ójöfnuði, m.a. ítrekað að þjófnaði í verslunum,“ segir hann.
„Hvorki lögregla né Félagsbústaðir virðast hafa aðhafst nokkurn skapaðan hlut. Ef ástæðan er skortur á sönnunum er það augljós fyrirsláttur. Sannleikurinn er öllu fremur sá að ekkert hefur verið aðhafst til að afla sannana.“
Jón segir fjölmiðla hafa sýnt málinu engan áhuga, fyrir utan DV sem hefur birt tvær fréttir um málið. Eina í nóvember 2023 og aðra í gær.
Jón vill að það verði tekið í taumana og skorar á framkvæmdastjóra Félagsbústaða ásamt formanni og framkvæmdastjóra Velferðarráðs Reykjavíkurborgar að stöðva þessa aðgerð án tafar og sjá til þess að bæði Félagsbústaðir og lögregla rannsaki málið ofan í kjölinn.
„Í stað þess að fleygja íbúum þessa hryllingshúss út á götu ættu Félagsbústaðir þvert á móti að endurgreiða fórnarlömbunum allnokkur ár aftur í tímann og biðja þá opinberlega afsökunar. Það er kominn tími til að þessu að linni,“ segir hann.
