Sædís Rún Heiðarsdóttir landsliðskona var að vonum sátt með 1-0 sigur á Úkraínu í undankeppni HM í gær, sem styrkir stöðuna í riðlinum mikið.
„Við fórum inn í leikinn til að taka þrjú stig og það er virkilega sætt að gera það. Við vitum að þessi þrjú stig voru mikilvæg,“ sagði Sædís við 433.is eftir leik.
„Mér fannst við hafa nokkuð góð tök á leiknum. Við gáfum þeim kannski nokkur færi en það var aðallega eftir okkar mistök. Það er því eitthvað sem við þurfum að skerpa á. En mér fannst við eiga marga góða spilkafla og krossa sem við hefðum getað skorað úr.“
Ísland mætir Evrópumeisturum Englands í næsta leik á laugardag og ljóst er að það verður öðruvísi leikur, þar sem íslenska liðið getur líklega ekki stýrt gangi mála eins og í gær.
„Það er gott að fara með þrjú stig í næsta leik. Við þurfum að skerpa á einhverjum hlutum og þétta okkur aðeins varnarlega því þetta verður náttúrulega allt öðruvísi leikur,“ sagði Sædís um leikinn á laugardag.
„Það er alltaf gaman að máta sig við þessa andstæðinga og ég er full tilhlökkunar.“
Viðtalið í heild er í spilaranum.
