Manchester City tekur á móti Arsenal í leik sem gæti haft gríðarlega mikla þýðingu fyrir titilbaráttuna á Englandi á sunnudag.

Arsenal hefur gengið illa síðustu vikur. Liðið tapaði úrslitaleik deildabikarsins gegn Manchester City, tapaði gegn Southampton í 8-liða úrslitum bikarsins, vann að vísu Sporting í Meistaradeildinni en tapaði svo á heimavelli gegn Bournemouth í deildinni.

Skytturnar eru með sex stiga forskot á toppnum en City á leik til góða og sem fyrr segir mætast liðin á sunnudag.

Þar gætu hlutirnir snúist við. Pep Guardiola, stjóri Manchester City, hlóð Arsenal og Mikel Arteta lofi eftir stórsigur sinna manna á Chelsea í gær.

„Arsenal hefur tapað þrisvar yfir 49 leiki og aldrei í Meistaradeildinni. Þeir hafa verið besta liðið á Englandi og í Evrópu það sem af er,“ sagði hann.

„Að vinna þá einu sinni er mjög erfitt, hvað þá tvisvar á nokkrum vikum,“ bætti hann við og á þar við úrslitaleik deildabikarsins sem City vann.

Arsenal mætir Sporting í seinni leik liðanna í 8-liða úrslitum Meistaradeildarinnar á miðvikudag áður en kemur að leiknum við City. Hefur það áhrif?

„Ég myndi elska að vera að fara að spila í miðri viku. Ég myndi elska að vera í stöðu Arsenal,“ sagði Guardiola.