Liverpool hefur verið orðað við kaup á miðjumanninum Adam Wharton frá Crystal Palace í sumar, en efasemdir eru sagðar uppi um leikstíl hans samkvæmt Daily Mail.
Wharton, sem er 22 ára gamall enskur landsliðsmaður, hefur slegið í gegn síðan hann kom til Palace frá Blackburn árið 2024 og þykir í dag með betri miðjumönnum ensku úrvalsdeildarinnar.
Fjöldi félaga fylgist með honum, þar á meðal Manchester United, Chelsea og Tottenham og gæti verðmiðinn farið upp í allt að 80 milljónir punda.
Liverpool hefur sem fyrr segir einnig verið nefnt til sögunnar en samkvæmt nýjustu fréttum hafa menn innan félagsins þó áhyggjur af líkamlegum styrk og hlaupagetu Wharton, einnig hvort hann henti liði sem vill mikið halda í boltann.
Það er því ekki ljóst hvort Liverpool láti yfir höfuð til skarar skríða varðandi Wharton í sumar, en ljóst er að einhver félög munu reyna við kappann.
